गोरिया करत अपन सिंगार।
बारन मां मोतिया चमकाये
रोम-रोम महकाए
भरै माँग सेंदुर से जब
दम-दम मुखड़ा दमकाए
जूड़े मां जूही कै माला
जुलुम करै रसनार
गोरिया करत अपन सिंगार।।१।।
कानन मां जगमग बाली-झूमर
गले मां हार लटकाए
लाल-लाल आंखिंन मां ड्वारा
तेहपर काजरु सजाए
गालन मां चकमक-सुरखी चमकै
दिल का कैसे देई करार
गोरिया करत अपन सिंगार।।२।।
हाथन मां चम-चम चूड़ी चमकै
होठन मां लाली सजाए
छम-छम ओहकी पायलिया बोलै
रहि-रहि गोरिया लजाए
अंखियन ते जब चलै दुधारी
फ़ाटत करेजवा हमार
गोरिया करत अपन सिंगार।।३।।
............................... गोपाल कृष्ण शुक्ल
No comments:
Post a Comment